هل تغول الاتحاد هو سبب مشاكل تونس
 |
| الاتحاد-العام-التونسي-للشغل |
حربوشة نيوز
كتب ماهر العباسي من تونس
باش ما يغلطوكمش المحللين بودورو الي عندهم عشرة سنين يبيعولكم في الأوهام :
تونس فيها برشة مشاكل تسببت في إنهيار إقتصادها ومن أهم مشاكل تونس هي
* تغوّل إتحاد الشغل وإجبارو للحكومات المتعاقبة أنها تزيد في الأجور والمنح والترقيات والساعات الإضافية والإنتدابات وهي لا تملك الفلوس الي تتطلبها الزبادات هذي مما أضطرها للإقتراض المبالغ فيه
* تغوّل إتحاد الشغل وقيامو بعشرات آلاف الإضرابات وتحوّل العديد من النقابيين لباندية كسرو إحترام التسلسل الوظيفي وولى العامل يشد يسخسخ مدير وهذا بطبيعة الحال إنجر عليه القضاء على حاجة إسمها مردودية وإنتاجية
* الزوز نقاط الي فاتو خلقو مناخ لا يشجّع على الإستثمار وأدى إلى مغادرة مئات المستثمرين للبلاد
* التغوّل هذا متاع الإتحاد عطى فكرة أنو الدولة ضعيفة وخلى المواطنين يتجرؤو على الدولة ويسكرو جميع مصادر الإنتاج ... الفسفاط ... البترول ... الغاز في قرقنة ... المجمع الكيميائي في ڤابس ... تسكير الكياسات .... وحرم الدولة من موارد هي في أمس الحاجة ليها
* التغوّل هذا متاع المواطن زاد أكّد أنو الدولة ضعيفة وشجّع المجرّمة والقطعية أنهم يكثفو مالإجرام متاعهم الشيء إلي خلى إنعدام الأمن ينضاف للمناخ الغير مشجع عالإستثمار
* على هذا الكل نزيدو الإرهاب إلي عطانا ضربات قاصمة ... نزيدو الظرف الإقليمي والدولي إلي زاد خنقنا ... نزيدو الحالة المكربة إلي لقينا عليها تونس بعد هروب بن علي ... قطاع صحة مدمّر تعليم مدمّر نقل مدمّر .... إدارة قروسطية تكبّل أي مخلوق يحب يتقدم بالبلاد وفساد مستشري في جميع مفاصل الدولة.
* زيد على هذا عدم الإستقرار السياسي الي ما خلى حتى حكومة تركز وتبدا في الإصلاحات
* وأخيرا وليس آخرا مؤسسات عمومية فالسة وتخدم في آلاف الخدامة الزايدين على حاجتها وكل عام تاخو من عند الدولة مئات المليارات باش تخلص العجز متاعها والدولة بالطبيعة تمشي تتسلفهم
هذومة مشاكلنا الحقيقية ... الأحزاب عندهم جزء مالمسؤولية في المشاكل هذي خاطر ماواجهوهاش بشجاعة وتعاملو معاها بجبن وبأيادي مرتعشة وحسابات سياسوية مقرفة ... ولكن الأحزاب موش هوما إلي خلقو المشاكل هذومة ودونك كيف تنحي الأحزاب مالصورة المشاكل هذومة موش باش يتنحاو ... الإتحاد باش يقعد متغوّل والانتاج باش يقعد متوقف والمواطن مايخدمش ويحب ياخو كل شيء والمؤسسات العمومية فالسة ومتخلفة .....
مجابهة المشاكل هذي تطلب شجاعة ويد من حديد .... وإرجاع الإتحاد لحجمو والضرب بالنيترات دامونيوم على الفوضى والتسيب والشعبوية وتسكير مناطق الإنتاج
إيهام التوانسة أنو فقط إبعاد الأحزاب باش يحل المشاكل هو تبلعيط وكذب وشعبوية وتفليم وبيعان الريح للمراكب .... وأتو تشوفو أنو حكومة المشيشي لن تفعل أي شيء في المشاكل الحقيقية.